Secretariado Xitano Pontevedra - 2018

Esta asociación que se estende ao longo de toda España, traballa pola promoción integral da comunidade xitana desenvolvendo todo tipo de accións que contribúan a alcanzar a plena cidadanía das persoas xitanas, a mellorar as súas condicións de vida, a promover a igualdade de trato e a evitar toda forma de discriminación, así como promover o recoñecemento da identidade cultural da comunidade xitana.

Concretamente, as súas actuacións encádranse no ámbito do traballo, a educación, a vivenda, a inclusión social, a igualdade de trato e de xénero, a acción internacional, e a promoción da cultura.

Dentro da fundación, traballamos nun proxecto chamado PROMOCIONA, que se puxo en marcha no 2009, é financiado polo Fondo Social Europeo. Ten como obxectivo que os xitanos máis novos rematen a Educación Secundaria Obrigatoria e continúen estudando, o que lles permitirán ter mellores condicións de acceso ao mercado laboral.

As “aulas promociona” son clases grupais de apoio escolar a rapaces e rapazas xitanas para mellorar o seu nivel académico e tamén traballar o desenvolvemento de rutinas e de normas escolares que lles permitan mellorar nas diferentes materias.

Está dirixido aos distintos axentes que participan no proceso educativo dos menores, pero os principais protagonistas son os alumnos e as familias.

Trabállase en tres niveis de intervención, o individual, o grupal e o sociocomunitario, pero nós centrámonos no nivel grupal, mediante o cal levamos a cabo sesións de apoio escolar e de acción grupal cos rapaces e rapazas, para que traballaran as competencias básicas e transversais, mentres se lles ofrecía apoio para reforzar os seus coñecementos nas distintas asignaturas.

Dende que comezamos o proxecto PEINAS aprendemos un montón de cousas que descoñecíamos sobre a etnia xitana e démonos conta de como cambiou o noso punto de vista cara eles, posto que vivimos nunha sociedade chea de estereotipos e prexuízos que, aínda sen querelo, acaba influíndo nas nosas vidas.

A medida que fomos traballando cos nenos e nenas xitanas puidemos observar a pouca importancia que os pais destes lle conceden á educación, pero aínda así, a pesar de que moitos non teñen un nivel educativo adecuado para a súa idade, algún deles si que se interesan por aprender.

Nas súas familias non teñen referentes con carreiras universitarias ou grados superiores, e por iso non contan cun apoio familiar que os guíe, e que lles motive cos estudos. Isto non se da en tódolos casos, e grazas a esta fundación, esperamos que isto vaia cambiando e nuns anos non existan este tipo de problemas.

Outras das cousas interesantes que aprendemos foi que existen numerosos mitos sobre eles, como o de que lle pagan por asistir á escola, que non son certos, e que provoca que teñan unha peor imaxe.